عابر سبيل كتب:

الشارع فاير فورة السنين..... الناس منططه عيونه ..... النساوين الدهشة كاتلاهم ....كل واحدة ماسكة اضان صحبتا وتوشوش ليها في حاجة ....الخبر طرح ......قالوا بت الحسن الشايقية النجيضة عضت راجله عباس ود الازرق .... عباس السكران اليوم كلو زي القرد ....عضتو في ضراعو .... لمن سنها اتكسرت..من صباحية الله قام عباس من دربو للحكيم .... قال يشوف ليهو علاج .... من عضة الولية دي.... النساوين في الخضار ما عندهن كلام غير عضة بت الحسن لعباس...شلاقة النساوين زايدة ... كلو واحدة تفتي بي رايا .....

: المراة دي جنت ولا شنو ... والله دي سواية مجانين بس
: هسي عليكم الله بت الحسن دي ماله .... الا يكون عندها سبب ما براها
: سبب شنو البخلي مراة تعضي راجلة .... يا انتي
: يمكن طعنا في شرفه
: عليك النبي شوفن جنس التخاريف دي
: ولا يمكن شافتو مع واحدة
: هسي في ذمتك دي .... حارة الخيانة ولا حارة الضرة .... عباس ده ما اتزوج فيها قبل سنين ليه ما عضتو ... لمن تشوفو مع واحدة تسوي سوايته دي
: هههه ....يمكن بتريدو
: اسكتي انتي كمان .... ريدة شنو .... لو كانت كل مراة بتريد راجلة بتعضيهو كان رجالنا كملو من زمان ....من كترة العضعيض

عباس رجع لافي ايدو ....نافخ جضيماتو ..... حلف بالطلاق انه المراة دي ما تقعد معاهو دقيقة في البيت ... من دربها ده لبيت اهلها ...يا عباس قول يا لطيف .... يا عباس اخزي الشيطان .... دي عشرة سنين
: يا عباس صلي علي النبي .... دي ام اولادك
: تشيلهم معاها .... بس تتخارج لي من البيت ده
: يا عباس اهدى
: اهدى شنو .... بعد اربعين سنة جابت لي عضعيض كمان .... ياهو الفضل
: يا عباس اكيد في سبب ما ساكت المراة دي قامت من النوم ولقتك راقد عضدتك
: اين كان السبب في مراة محترمة تعضي راجلة
المسألة بقت بوليس كيس .... بت الحسن مشت للقسم ولقت الشاويش على ...قاعد ... وقالت الا تفتح بلاغ في راجلة عباس ....
: آآآآآآآي عضيتو .... الراجل الاضينة ده .... الراجل الدلوكة ولو لقيتو تاني بعضيهو.... كيتن كده
: اهدي يا حاجة بت الحسن .... الامور ما بتتعالج كده
تبكي بت الحسن الشايقية النجيضة .... تبكي وتكورك ... انا ما بسيب حقي .... انا امك يا جعفر ....عُشرة سنين هانت على الراجل المزعمط ده .... الله يقطع سنينو ..... الله يكتلوا ان شاء الله ... صبرت عليهو الراجل السكران... الحيران .... ما قدر صبري

دخل العسكري ومعاهو عباس رابط يدو .... يعاين عباس لبت الحسن
: تفي عليك يا مراة يا عضاعضة .... يا مراة يا مسترجلة يا قليلة الادب
: عليك يا واطي ....... يا مصرمع
الشاويش على يهدي في بت الحسن وعباس ..... وبت الحسن تبكي ... وعباس نفسوا طالع ونازل .... الولية جابت كثافتو ....رفعت ضغطتو ....
: احكي يا عباس الحاصل شنو
: يا خد نفس .... يسكت شوية ....ينفخ في الهواء ... والله يا افندم ... المراة دي من اتزوجتها ما شميت عافية ....يوم ضارباني بالشبشب ، يوم فالقاني بي حلة .... وهسي جابت ليها عضعيض..... بكرة يا افندم بتجيب ليها سكاكين كمان

: سكين اليكتلك يا سكران
: سكران بي حقي يا وليه يا خرفانة

الشاويش علي يهدي تاني ... واصل يا حاج عباس .... يا افندم انا نايم في امانة الله ... في الصباح القي الولية الخرفانة دي معلقة في ضراعي ده .... ومغرزة اسنانة فيهو ... لمن جابت لي تتنس ....قمت من النوم مخلوع اكورك زي الراكبني جن ..... دي سواية مراة نصيحة .....
تتدخل بت الحسن .... :ما توريه عضيتك لي شنو يا سجمان ....

: وريهو انتي يا الفاهمة يا الراسية
: ورينا انتي يا حاجة الحاصل شنو

تبكي بت الحسن .... والله يا جنابو الشاويش انا صابرة على المعفن ده اربعين سنة ما قلت بغم .... جاب لي الضرة ما قلت حاجة .... يغمز للنساوين في الشارع قلت بكرة بزهج ... يعاين للبنات المايعات في التلفزيون أقول تخاريف كبار ..... يجيني سكران أقول بكرة يعقل.... آخرته كمان في النوم ..... ينادي في نناسي عجرم و يتغزل في شكيرة .... وانا نايمة جنبو زي القفة والصباح اقول ليه ده شنو يا عباس:

: يقول لي خلي صدرك واسع زي نجوى كرم