ما عارفة ليه زمان كان بفهمونا انو البكا دا بس من حق النسوان ولما كان واحد من الاولاد يبكي كان الناس يضحكو عليهو ويقولو ليهو المرة رغم انو موضوع البكا دا ما فيهو راجل ومرة هم الاتنين بحسو وبشعرو زي بعض وساعات بكونو محتاجين بنفس القدر لنهم يبكو ويطلعو بي البكا كل الكاتمنو في قلوبم دا غير انو البكا ممكن يكون حل لي مشاكل كتير هو ما حل عملي اكيد بس اقلاها الواحد لما يبكي بخفف عن نفسو شوية وبرتاح .انا عن نفسي بكاية شديد ببكي لما ازعل ولما يفهموني غلط ولما اكون عايزة اعمل حاجة وما اقدر اعملا وساعات ببكي من غير سبب ما اصلو نحنا البنات البكا بالنسبة لينا حاجة مسموحة ودي الحاجة الوحيدة المسموح لينا بيها والحاجة الوحيدة المحرمة علي الاولاد بس انا جد زعلانة على ادم وعدم بكاهو خاصة انو كتير علماء قالو انو عدم البكا ممكن يعمل ازمات قلبية واضطرابات معدة وانو البكا بساهم كتير في الراحة النفسية ز
وحبيت كتير كلام احلام مستغانمي لما قالت :احتقر الناس الذين لا دموع لهم فهم اما جبابرة او منافقون وفي الحالتين لا يستحقون الاحترام
اخيـــــــــــــــــــــــــــــــــــــــرا:لو انت راجل ابكي.